A Escuela d’Aragonés Nogará, con a colaborazión d’a Fundación CAI y o Gobierno d’Aragón organiza, como toz os años, as XVI Chornadas d’as luengas d’Aragón. Ista begada serán os días 30 de marzo, 1, 2 y 3 d’abril en Zaragoza, en o Centro Joaquín Roncal; y o sabado 4 d’abril en Tarazona con a colaborazión de Ziesma.

Istas chornadas anuals se son tornando una zita obligada ta tot qui quiera conoixer de primera man a salut d’o multilingüismo en Aragón y millorar os suyos conoiximientos sobre tot que tienga relazión con as ditas luengas. Asinas, por exemplo, l’atro año i abió una mesa redonda con os partius politicos d’a Comunidat charrando sobre a lei de luengas,  una muit buena charrada sobre o turismo en aragonés (con testimonios dende Echo dica Chistau) y un atra charrada d’uno d’os millors lingüistas en a branca d’o multilingüismo d’España, Juan Carlos Moreno Cabrera, qui fazió una ambista cheneral d’a situazión d’os nazionalismos lingüísticos d’as luengas mayoritarias sobre as chicotas.

En ista ocasión, a Escuela d’Aragonés Nogará, que fa parte de l’Asoziazión Cultural Nogará, nos ufre un cartel encara más interesán. Asinas, o luns día 30 de marzo a las 19h, se fará o debat “Luengas en o limite” con a partizipazión d’una asoziazión protectora d’o lionés (El Fueyu), a mesma A.C. Nogará, de parte de l’aragonés, y una asoziazión que treballa por protecher y rebiscolar a luenga zelta cornica, d’o suroeste de Gran Bretaña (Keskowethyans an Taves Kernewek).

O miércols, día 1 d’abril a las 19h se fará a charrada “As luengas y as academias”, aon farán parla as tres instituzions encargadas de normatibizar as tres luengas que se charran en Aragón, ye dezir, o Institut d’Estudis Catalans, l’Academia de l’Aragonés, y a Real Academia d’a luenga Española, encara que ista zaguera pareixe que no ha confirmau ni desmentiu encara a suya asistenzia, de traza que no apareixe en o programa.

D’atra man, o chuebes día 2 d’abril a las 19h, o títol d’a charrada será “L’atlas d’a UNESCO sobre as luengas menazadas”, y a estrela en iste caso será Christopher Moseley, o lingüista australiano editor chefe d’o dito atlas que ya en emos charrau anteriormén en a rebista Ambista. Sin duda, una ocasión unica ta sentir en boca d’una personalidat como él o nombre d’ista luenga en periglo d’extinzión.

Cuanto a o biernes día 3 d’abril a las 19h se fará un taller practico de biquipedia [wikipedia en aragonés], aon tot qui quiera amanar-se-ie podrá aprender o funzionamiento interno d’ista gran enziclopedia ubierta y, a más, se podrá enfaixengar por ixe mundo dichital.

Finalmén, o sabado 4 d’abril, en metat d’una serie de cursas y combibenzias en Tarazona grazias a la colaborazión de Ziesma, organizazión local de Nogará, se fará de tardes una charrada sobre si “ye posible bibir en aragonés en o sieglo XXI”, en memoria d’un atra d’igual títol que se fazió fa años en Nogará Zaragoza.